,,სოკარის რეგიონალური თასის“ გათამაშებაზე ნახევარფინალური შეხვედრები გაიმართა
6 ნოემბერს ,,სოკარის რეგიონალური თასის" გათამაშებაზე 2006 წელს დაბადებულ ჭაბუკებს შორის ნახევარფინალური შეხვედრები გაიმართა.
პირველ მატჩში ერთმანეთს მეორე ჯგუფის გამარჯვებული ,,მარგვეთი - 2006" ზესტაფონი და პირველი ჯგუფის მეორე ადგილოსანი ,,კომპლექსური სპორტული სკოლა" სამტრედია დაუპირისპირდნენ. შეხვედრა საკმაოდ საინტერესო გამოდგა. ანგარიში ზესტაფონელმა ლუკა კახნიაშვილმა გახსნა, თუმცა სამტრედიელმა ლევან გუგუციძემ თანაფარდობა მალევე აღადგინა და პირველი ტაიმი ფრედ დასრულდა. მატჩის მეორე ნახევარი გარდამავალი უპირატესობით წარიმართა, მაგრამ შეხვედრის ბოლოს უფრო სამტრედიელებმა იძალეს და უკანასკნელ წუთზე გიორგი ჩხაიძის მიერ გატანილი გოლის წყალობით ფინალში გავიდნენ.
ნახევარფინალის მეორე შეხვედრა ქუთაისის ,,ტორპედოსა" და საჩხერის ,,ჩიხურას" შორის კიდევ უფრო დაძაბული გამოდგა. თავიდან ზემო იმერლები დაწინაურდნენ. ბურთი ლუკა ივანაშვილმა გაიტანა და ტაიმიც საჩხერელთა სასარგებლოდ დასრულდა. მეორე ნახევარში ტორპედოელთა უპირატესობა გამოიკვეთა და 43-ე წუთზე ლუკა ცუხიშვილმა წონასწორობა აღადგინა. მატჩის ბოლოს ისევ ქუთაისლები აქტიურობდნენ, თუმცა ანგარიში აღარ შეცვლილა და შეხვედრაც ფრედ დამთავრდა.
დებულების თანახმად გამარჯვებულის გამოსავლენად პენალტების სერია დაინიშნა. საფეხბურთო ლატარეაში უფრო იღბლიანები ტორპედოელები აღმოჩნდნენ, მათ მეტოქე (4-3) დაამარცხეს და ფინალის საგზური მოიპოვეს.
ამრიგად მესამე ადგილის მოსაპოვებლად ერთმანეთს ,,მარგვეთი - 2006" ზესტაფონი და ,,ჩიხურა" საჩხერე დაუპირისპირდებიან. შეხვედრა 7 ნოემბერს წყალტუბოში ,,26 მაისის" სახელობის სტადიონზე 12 საათზე გაიმართება.
ტურნირის ფინალური შეხვედრა, რომელიც თენგიზ სულაქველიძის სახელობის თასის მფლობელს გამოავლენს 13 ნოემბერს ჩატარდება.
- გადასვლები: 2936