რაჭველთა იმერული ვოიაჟი

4 აპრილს, იმერეთის ღია ჩემპიონატზე გათამაშების სტარტი 2000-2001 წლებში დაბადებულმა ჭაბუკებმა აიღეს. გათამაშებაში მონაწილე ქუთაისის "მართვეს" ორივე გუნდს საშინაო მატჩები ჰქონდა. პირველმა ამბროლაურის "რაჭას" უმასპინძლა და 1:2 წააგო. მატჩი სამივე გოლი სტუმრებმა გაიტანეს - ლევან გონაძემ საკუთარ კარში, გაგა ჯოხაძემ (2) კი მეტოქისაში.

რაც შეეხება მეორე იმერულ-რაჭულ დაპირისპირებას, მასში დავით და რევაზ ბურკაძეების გაწვრთნილმა "მართვემ" მოიგო. ანგარიში მატჩის დასაწყისში ბაქარ ლომთაძემ გახსნა, ხოლო საბა ტერელაძემ თამაშის საბოლოო შედეგი მეორე ტაიმის მიწურულს დააფიქსირა - 2:0.

ამ მატჩის წინ მოხდა ჯუმბერ ხაჟალიას სახელობის თასის შარშანდელი გამარჯვებულის ქუთაისის "მართვეს" 2001-წლამდელთა დაჯილდოება. მამა-შვილი ბურკაძეების გაწვრთნილმა გუნდმა 2016 წლის გარდამავალი გათამაშების გადამწყვეტ მატჩში, რომელიც 5 დეკემბერს გაიმართა, ზესტაფონის "მარგვეთს" 3:0 სძლია.

კიდევ ერთ გუშინდელ დაპირისპირებაში ხელვაჩაურის "მაჭახელა-2"-მა ვანის "მართვეს" უმასპინძლა. აჭარლები ლაშა კახიძის გოლით კარგა ხანს იგებდნენ, მაგრამ მატჩის დასრულებამდე დარჩენილ 10 წუთში იმერლებმა, კერძოდ კი გიორგი ქიმუცაძემ (2), შეძლეს შეხვედრის თავიანთ სასარგებლოდ დასრულება - 1:2.