1


იმერეთის რეგიონალური 

ფეხბურთის ფედერაცია

რუსთაველის გამზირი №1
ტელ: 579598787
irff.dr@gmail.com

Home

შვეიცარიაში უეფას 45-ე კონგრესი გაიმართა

45th Ordinary UEFA Congress


შვეიცარიის ქალაქ მონტროში უეფას 45-ე კონგრესი გაიმართა. ევროპული ფეხბურთის მმართველი ორგანიზაციის წევრი ფედერაციის ხელმძღვანელებმა დღის წესრიგით გათვალისწინებულ რამდენიმე მნიშვნელოვან საკითხზე იმსჯელეს. უეფას კონგრესს საქართველოს ფეხბურთის ფედერაციის პრეზიდენტი ლევან კობიაშვილი და გენერალური მდივანი დავით მუჯირი ესწრებოდნენ.

კონგრესის მიმდინარეობისას უეფა-ს კომიტეტების საქმიანობა შეჯამდა, მათ შორის, ფეხბურთის კომიტეტის, რომლის თავმჯდომარე, საქართველოს ფეხბურთის ფედერაციის პრეზიდენტი ლევან კობიაშვილია.

უეფას კონგრესის ფარგლებში ორგანიზაციის წევრმა 55 ქვეყნის ფედერაციის წარმომადგენლებმა სპეციალური განცხადება შეიმუშავეს, რომლითაც დაგმეს ევროპული სუპერლიგის იდეა, რომელიც ბოლო დღეების განმავლობაში მთელი მსოფლიოს მასშტაბით განხილვის მთავარი თემა იყო.

უეფას კონგრესს ფიფას პრეზიდენტი ჯანი ინფანტინო და საერთაშორისო ოლიმპიური კომიტეტის პრეზიდენტი ტომაშ ბახიც ესწრებოდნენ. ორგანიზაციის ხელმძღვანელებმა სრული მხარდაჭერა გამოუცხადეს უეფას და მის წევრ ყველა ფედერაციას, აგრეთვე გულშემტკივრებს მთელი მსოფლიოს მასშტაბით.

უეფას 45-ე კონგრესის განცხადება

"უეფა-ს ყველა წევრი ასოციაცია და 45-ე რიგითი კონგრესის მონაწილეები გმობენ ე.წ. "ევროპული სუპერლიგის" გამოცხადებას. დახურული "სუპერლიგა" პირდაპირ ეწინააღმდეგება ერთიანი, ღია და სპორტული ღირებულებების პრინციპზე აგებული ევროპული იდეის კონცეფციას. უეფა და მისი წევრი ასოციაციები მხარს უჭერენ ნამდვილ ევროპულ მოდელს, რომელიც დაფუძნებულია ღია კონკურენციაზე, სოლიდარობასა და რესურსების გადანაწილებაზე, რათა უზრუნველყოს ფეხბურთის მდგრადობა და განვითარება ყველას საკეთილდღეოდ, ასევე ევროპული ღირებულებების პოპულარიზაცია და სოციალური შედეგების მიღწევა.

აღნიშნული შეთქმულების მონაწილე კლუბები აშკარად ვერ აცნობიერებენ, რომ მათი დღევანდელი სტატუსი არა დამოუკიდებლად იქნა მიღწეული, არამედ წარმოადგენს დინამიური ევროპული სისტემის ნაწილს, სადაც დიდი, საშუალო და მცირე კლუბები კოლექტიურად განაპირობებენ ყველა გუნდის წარმატებასა თუ წარუმატებლობას. მათ მიერ "განცალკევების" მოთხოვნა და კოლექტიურად შექმნილი მემკვიდრეობის მითვისებისთვის მცდელობა წარმოადგენს ევროპული ღირებულებებისა და სპორტული პრინციპების შელახვას.

უეფა, მისი წევრი ასოციაციები და ყველა, ვისაც უყვარს ფეხბურთი, მტკიცედ შეეწინააღმდეგებიან აღნიშნული კლუბების მფლობელებისა და მათი მხარდამჭერების მიერ გადადგმულ ნაბიჯებს. ჩვენ ვაცნობიერებთ ამ საკითხის მორალურ მნიშვნელობას და მზად ვართ, დავიცვათ ფეხბურთი ეგოისტური ჯგუფისგან, რომელიც არანაირად არ ზრუნავს სპორტის განვითარებაზე. ჩვენ ვართ ევროპული ფეხბურთი, არა ისინი." - ნათქვამია განცხადებაში.


დღესვე უეფას კონგრესის ფარგლებში ორგანიზაციის აღმასრულებელი კომიტეტის წევრები ოთხი წლის ვადით აირჩიეს. აგრეთვე იმსჯელეს გასული და მომავალი საფეხბურთო სეზონის ფინანსურ საკითხებზე.

უეფას რიგით 46-ე კონგრესი, 2022 წლის, 11 მაისს ქალაქ ვენაში გაიმართება.


------------------------------------------------------------------------------------------------------------------------------------

სფფ-ის პრეზიდენტის შეხვედრა კულტურის, სპორტისა და ახალგაზრდობის მინისტრთან

 DSC2825

საქართველოს კულტურის, სპორტისა და ახალგაზრდობის მინისტრი თეა წულუკიანი, მინისტრის მოადგილესთან სოსო გიორგაძესთან ერთად, სპორტულ ფედერაციებთან სამუშაო შეხვედრებს მართავს.

აღნიშნულ ფორმატში, მინისტრმა პირველი შეხვედრა საქართველოს ფეხბურთის ფედერაციის პრეზიდენტთან, ლევან კობიაშვილთან გამართა. ლევან კობიაშვილი მინისტრსა და მის მოადგილეს ფედერაციაში მიმდინარე და დაგეგმილ პროექტებზე, ასევე ფეხბურთში ახალგაზრდების უფრო მეტად ჩართულობის აუცილებლობაზე ესაუბრა.

თეა წულუკიანმა ლევან კობიაშვილს სამინისტროს პრიორიტეტული მიმართულებები გააცნო და ხაზი გაუსვა მასობრივი სპორტის განვითარების მნიშვნელობას. შეხვედრის ფარგლებში სამინისტროს არსებული რესურსების გათვალისწინებით, პრიორიტეტად 6-დან 14 წლამდე ასაკის ბავშვებთან მუშაობა დასახელდა. მხარეებმა აღინიშნეს, რომ ფეხბურთი საქართველოში ერთ-ერთი ყველაზე პოპულარული სპორტია, რაც კარგ საფუძველს იძლევა იმისთვის, რომ მასში რაც შეიძლება მეტი ახალგაზრდა ჩაერთოს. აქვე აღინიშნა, რომ განსაკუთრებით მნიშვნელოვანია ფეხბურთში გოგონათა ჩართულობის ზრდა.

შეხვედრაზე საუბარი შეეხო ფეხბურთის განვითარების ფონდს, ასევე, 2023 წელს გასამართ 21-წლამდე ფეხბურთელთა ევროპის ჩემპიონატს, რომელსაც საქართველო რუმინეთთან ერთად უმასპინძლებს. ევროპის ჩემპიონატის ფინალურ ეტაპზე 16 გუნდი ითამაშებს, რომელებიც ოთხ ჯგუფში გადანაწილდებიან. მატჩები თბილისში, ბათუმსა და ფოთში გაიმართება. ევროპის ჩემპიონატის ფინალურ მატჩს ბათუმის ახალი სტადიონი უმასპინძლებს, რომელმაც უეფა-ს უმაღლესი შეფასება დაიმსახურა.

მინისტრთან შეთანხმებით გადაწყდა ევროპის ჩემპიონატის სამუშაო ჯგუფის ჩამოყალიბება, რომელშიც სამინისტროს და ფეხბურთის ფედერაციის თანამშრომლების გარდა, სხვადასხვა სამთავრობო უწყებების წარმომადგენლები შევლენ და ევროპის ჩემპიონატის საორგანიზაციო საკითხების გადაჭრაზე იმუშავებენ.

შეხვედრის ბოლოს, თეა წულუკიანმა ლევან კობიაშვილს სრული მხარდაჭერა აღუთქვა და იმედი გამოთქვა, რომ ფეხბურთის ფედერაციის მსგავსად, სხვა ფედერაციებიც შეძლებენ სამინისტროს დახმარება შესთავაზონ მასობრივი სპორტის განვითარების საქმეში.

------------------------------------------------------------------------------------------------------------------------------------

ირფფ-ს XI საარჩევნო ყრილობა.

28E6E06A-F853-4DDC-A914-17478CBFFAE8


მიმდინარე წლის 19 მარტს, ქ. ქუთაისში, დემოკრატიული ჩართულობის ცენტრების ქსელში, ჩატარდა იმერეთის რეგიონალური ფეხბურთის ფედერაციის რიგითი XI საარჩევნო ყრილობა, შემდეგი დღის წესრიგით:

1.წესდების ახალი რედაქციით დამტკიცება
2.პრეზიდენტის არჩევა
3.აღმასკომის წევრების არჩევა
4.სხვადასხვა

ყრილობას ესწრებოდნენ: საქართველოს ფეხბურთის ფედერაციის პირველი ვიცე-პრეზიდენტი ბ-ნი კახა ჭუმბურიძე და სფფ-ს პირველი ვიცე-პრეზიდენტის ასისტენტი ქ-ნი სალომე კიკალიშვილი.

რეგისტრირებული წესდების თანახმად, ირფფ-ს წევრების მიერ ყრილობაზე მოვლენილი იქნა და სამუშაო პროცესში მონაწილეობას იღებდა ხმის უფლების მქონე დელეგატების უმრავლესობა.

დელეგატების სრული მხარდაჭერით, მეორე ვადით ირფფ-ს პრეზიდენტად არჩეულ იქნა დავით რუხაძე.
ასევე, არჩეული იქნა ირფფ-ს აღმასკომის წევრები: ვახტან ბზიკაძე, ბადრი ნაკაშიძე, რამაზ დვალიშვილი და პაატა შალამბერიძე.

------------------------------------------------------------------------------------------------------------------------------------


საქართველო - ესპანეთის მატჩი გულშემატკივრებთან ერთად!

fans 1

უწყებათაშორისი საკოორდინაციო საბჭოს გადაწყვეტილებით, 28 მარტს ფიფას 2022 წლის მსოფლიო ჩემპიონატის საკვალიფიკაციო ეტაპის მატჩზე გულშემატკივარი შეზღუდული რაოდენობით შეძლებს დასწრებას. საქართველო - ესპანეთის მატჩზე სტადიონის ტევადობის 30 პროცენტი დაიშვება. აღნიშნულთან დაკავშირებით, სფფ-ის გენერალურმა მდივანმა კომენტარი გააკეთა:

დავით მუჯირი: "ძალიან სასიხარულოა, რომ საქართველო - ესპანეთის მატჩი გულშემატკივრის თანდასწრებით გაიმართება. ჩვენი გუნდისთვის ძალიან მნიშვნელოვანია ქართველი გულშემატკივრის მხარდაჭერა. სამწუხაროდ, უეფა-ს რეგულაციებით, სტადიონის საერთო ტევადობის მხოლოდ 30 პროცენტი დაიშვება. შესაბამისი სტრუქტურების გადაწყვეტილებით, ეს კვოტა მაქსიმალურად იქნება ათვისებული და დაახლოებით, 15 ათას 500 გულშემატკივარს საშუალება მიეცემა დინამო არენაზე უგულშემატკივროს საკუთარ გუნდს.

ამ გადაწყვეტილების შესახებ უეფასთან კომუნიკაცია უკვე გვქონდა და პირველადი კონსულტაციები მატჩის ორგანიზების შესახებ უკვე გავიარეთ. ასევე დამატებით მოხდება შეხვედრა ადგილობრივ შესაბამის სტრუქტურებთან. ყველა რეგულაცია მატჩზე დასწრებასთან დაკავშირებით, ორშაბათს გახდება ცნობილი და ინფორმაციას ჩვენი ვებ-გვერდის საშუალებით გავავრცელებთ.

რაც შეეხება ბილეთების გაყიდვას, უეფა-ს რეკომენდაციით, გულშემატკივარს მატჩზე დასასწრები ბილეთის შეძენა ონლაინ რეჟიმში, პირადი ნომრის მითითებით შეეძლება. ყველა ის ადამიანი, რომელიც მატჩის ბილეთს შეიძენს, მატჩის დღეს ღამის 12 საათამდე გადაადგილების უფლება ექნება."
საქართველოსა და ესპანეთის ნაკრებებს შორის დაპირისპირება 28 მარტს დინამო არენაზე 20:00 საათზე დაიწყება.

საქართველოს ეროვნული ნაკრების განრიგი:
25 მარტი, 23:45
შვედეთი - საქართველო

28 მარტი, 20:00
საქართველო - ესპანეთი

31 მარტი, 22:45
საბერძნეთი - საქართველო

------------------------------------------------------------------------------------------------------------------------------------

ირფფ-ს აღმასრულებელი კომიტეტის სხდომა.


ooooooooooooooo

26 თებერვალს, იმერეთის რეგიონალური ფეხბურთის ფედერაციის აღმასრულებელი კომიტეტის სხდომა გაიმართა. კომიტეტის სხდომას ესწრებოდნენ: ირფფ-ს პრეზიდენტი დავით რუხაძე (თავმჯდომარე), ვახტანგ ბზიკაძე, ბადრი ნაკაშიძე და ირფფ-ს გენერალური მდივანი გივი ბაბუნიძე. კომიტეტის წევრებმა დღის წესრიგით გათვალისწინებულ საკითხებზე იმსჯელეს.
იმერეთის რეგიონალური ფეხბურთის ფედერაციის აღმასრულებელი კომიტეტის მთავარი თემა რიგით XI საარჩევნო ყრილობის თარიღის დანიშვნა იყო.
ირფფ-ს აღმასრულებელმა კომიტეტმა დაადგინა, რომ ირფფ-ს რიგით XI საარჩევნო ყრილობა გაიმართება ამა წლის 19 მარტს ქ.ქუთაისში.
--------------------------------------------------------------------------------------------------------------------------------------------

JPAGE_CURRENT_OF_TOTAL

Free business joomla templates